კანადა ამერიკასთან მოლაპარაკებებს აწარმოებს, ტრამპის „ოქროს გუმბათად“ წოდებულ თავდაცვის სისტემაში გაწევრიანებასთან დაკავშირებით. ინფორმაციაზე BBC წერს.
კანადის მთავრობა აცხადებს, რომ რაკეტსაწინააღმდეგო თავდაცვის სისტემაში გაწევრიანება მიზნად ისახავს, „ახალი თაობის“ საჰაერო საფრთხეების წინააღმდეგ ბრძოლას.
კანადის პრემიერ-მინისტრის თქმით, მათ აქტიურად დაიწყეს მოლაპარაკებები თეთრ სახლთან მას შემდეგ, რაც დონალდ ტრამპმა ახალი რაკეტსაწინააღმდეგო თავდაცვის სისტემის გეგმა წარმოადგინა.
ექსპერტები ეჭვობენ, რამდენად რეალურია ამ გეგმაზე მუშაობა და როგორ მიიღებს მონაწილეობას კანადა ან „რამდენს გადაიხდის“. როგორც აღმოჩნდა, ტრამპმა პროექტის საწყის ფასად 25 მილიარდი დოლარი დაასახელა.
კანადამ „ოქროს გუმბათის“ სისტემაში გაწევრიანების სურვილი, ორ ქვეყანას შორის მიმდინარე სავაჭრო და უსაფრთხოების შესახებ მოლაპარაკებების შემდეგ გამოთქვა. „ჩვენ მათთან ვისაუბრებთ“, – აღნიშნა აშშ-ის პრეზიდენტმა, „მათაც სურთ თავდაცვა და ჩვენ, როგორც ყოველთვის, კანადას დავეხმარებით“, – დასძინა მან.
ამ ეტაპზე, როგორც ირკვევა, აშშ-ის ადმინისტრაცია კანადისგან „სამართლიანი წილის“ გადახდას ელოდება.
დონალდ ტრამპის გეგმა ნაწილობრივ შთაგონებულია ისრაელის „რკინის გუმბათით“, რომელსაც ქვეყანა 2011 წლიდან რაკეტების გასანადგურებლად იყენებს.
ექსპერტების მოსაზრებით, ამერიკამ, შესაძლოა, ვერ მოახერხოს მსგავსი ყოვლისმომცველი თავდაცვითი სისტემის შექმნა, გამომდინარე ქვეყნის ტერიტორიისა და მასშტაბისა. მათი თქმით, აშშ-ის სამხედროებმა პროექტი სერიოზულად რომც მიიღონ, არარეალურია იმის წარმოდგენა, რომ ის ტრამპის მიერ დასახელებულ ვადებში დასრულდება და მნიშვნელოვანია იმ ფაქტის გათვალისწინებაც, რომ „ოქროს გუმბათი“ შეერთებული შტატებისთვის უზარმაზარი ხარჯია, რაც ქვეყნის თავდაცვის ბიუჯეტის დიდ ნაწილს შთანთქავს.
დატოვეთ კომენტარი