კოლექტიური „ნაცმოძრაობის“ ოთხივე პარტიის ლიდერები იქნებიან, თუ რიგითი წევრები, რაც წააგეს არჩევნები, იმის მერე ყოველდღიურ რეჟიმში საუბრობენ რადიკალიზაციაზე, იმაზე, რომ მათი დღის წესრიგია, ქვეყანაში მოახდინონ კრიზისი, დესტაბილიზაცია, გამოიწვიონ ქვეყნის ეკონომიკური იზოლაცია, – ამის შესახებ ფრაქცია „ქართული ოცნების“ თავმჯდომარის მოადგილემ ლევან მაჭავარიანმა გადაცემა „დღის ქრონიკაში“ განაცხადა.
მაჭავარიანი გამოეხმაურა „ჩვენი საქართველო – სოლიდარობის ალიანსის“ აღმასრულებელი მდივნის გედევან ფოფხაძის გუშინდელ განცხადებას, რომლის თანახმადაც, ფოფხაძე 26 მაისს რადიკალიზაციის მომხრეა.
ლევან მაჭავარიანმა საზოგადოებას შეახსენა, რომ მაკკეინის ინსტიტუტმა ოპოზიციას გაიდლაინი გადასცა, რომ არჩევნების წაგების შემთხვევაში, აქციები სამოქალაქო დაპირისპირებაში უნდა გადაიყვანონ. დეპუტატმა ხაზგასმით აღნიშნა, რომ ოპოზიცია „ქართულ ოცნებას“ არჩევნების გზით ვერ დაამარცხებს.
„ისიც უნდა შევახსენო საზოგადოებას, რომ მათი ერთ-ერთი მთავარი ინსტრუქტორი მაკკეინის ინსტიტუტუია, რომელმაც პირდაპირ გაიდლაინი გადასცა ოპოზიციას, რომ თქვენ თუ წააგებთ არჩევნებს, ასე და ასე უნდა იმოქმედოთ და სამოქალაქო დაპირისპირებაში უნდა გადაიყვანოთ შემდეგ აქციებიო. ქალბატონმა თორტონმა განცხადება გამოაქვეყნა, ნოემბრის აქციები რომ იყო, ერთ-ორ თვეში დაახლოებით, რომ ძალიან წუხდა იმასთან დაკავშირებით, რომ როგორ არის სიტუაცია შენარჩუნებული, რომ დღემდე მსხვერპლი არ არის. გულისწყრომა გამოხატა. ისინი მთლიანად ამ გზამკვლევს მიჰყვებიან და რა თქმა უნდა, მათ უნდათ მსხვერპლი.
მათ სჭირდებათ სიტუაციის დაძაბვა, რადიკალიზაცია, ვინაიდან იციან, რომ ლეგიტიმურად, არჩევნების რეჟიმში „ქართული ოცნების“ ჩანაცვლება შეუძლებელია, ვინაიდან ისინი არიან უსამშობლოები – ეს სახელი ტყუილად არ დავარქვით და ჩვენი მოსახლეობის აბსოლუტური უმრავლესობა რწმუნდება იმაში, რომ მხოლოდ „ქართული ოცნება“ არის ამ ქვეყანაში მშვიდობის, სტაბილურობის, იდენტობის შენარჩუნებისა და ჩვენი ეროვნული თვითმყოფადობის გაძლიერების გარანტი. ჩვენი მოსახლეობის აბსოლუტური უმრავლესობა ამით ცხოვრობს, ეს არის მათ სისხლში, ეს არის მათ ძვლებში – შესაბამისად, ჩვენ ლეგიტიმურად ვერავინ მოგვიგებს არჩევნებს“, – განაცხადა მაჭავარიანმა.
