ფრანგი მსახიობი, ჟერარ დეპარდიე რომის სასამართლოს წინაშე წარდგება. დეპარდიეს იტალიელი ფოტოგრაფისთვის ფიზიკური შეურაცხყოფის მიყენებაში ედება ბრალი. ამის შესახებ „ევრონიუსი“ იუწყება.
იტალიელი ფოტოგრაფი-პაპარაცი, რინო ბარილარი დეპარდიეს იმაში ადანაშაულებს, რომ ფრანგმა მსახიობმა ბარილარის, რომელსაც „პაპარაცების მეფეს“ უწოდებენ, გასული წლის მაისში სახეში მუშტი ჩაარტყა.
გამოძიების ინფორმაციით, 76 წლის დეპარდიე იტალიაში, Harry’s-ს ბარში მეგობარ ქალთან ერთად სადილობდა, რა დროსაც ბარში 80 წლის ბარილარი შევიდა. ფოტოგრაფი ირწმუნება, რომ ჟერარ დეპარდიემ მას და საერთოდ იტალიელებს სიტყვიერი შეურაცხყოფა მიაყენა, შემდეგ კი მას ყინული ესროლა და სახეში სამჯერ დაარტყა.
დეპარდიე ბრალდებებს უარყოფს. ის ამბობს, რომ ბარილარიმ მას ხელი ჰკრა და ამ დროს თავი ვერ შეიკავა და თვითონ წაიქცა.
რამდენიმე დღის წინ პარიზის სასამართლომ დეპარდიე ორი ქალის მიმართ სექსუალურ შევიწროებაში დამნაშავედ ცნო და მას 1-წლიანი პირობითი პატიმრობა მიუსაჯა.
დატოვეთ კომენტარი