ისრაელის პრემიერ-მინისტრის ბენიამინ ნეთანიაჰუს განცხადებით, გაერთიანებული სამეფოს პრემიერ-მინისტრმა, კირ სტარმერმა და სხვა ქვეყნების ლიდერებმა ფაქტობრივად განაცხადეს, რომ „ჰამასის“ ხელისუფლებაში დარჩენა სურთ.
მან, ასევე, დაადანაშაულა სტარმერი, ემანუელ მაკრონი და მარკ კარნი „მასობრივი მკვლელების, მოძალადეების, ჩვილების მკვლელებისა და გამტაცებლების“ მხარდაჭერაში.
მისი თქმით, კირ სტარმერს, ემანუელ მაკრონს და მარკ კარნის სურთ, რომ ისრაელი „დამშვიდდეს და შეეგუოს იმ ფაქტს, რომ „ჰამასის“ მასობრივი მკვლელების არმია გადარჩება“.
ნეთანიაჰუმ განაცხადა, რომ „ჰამასს“ ისრაელის განადგურება და ებრაელი ხალხის განადგურება სურს.
„ვერასდროს გავიგებ, როგორ არიდებენ ამ მარტივ ჭეშმარიტებას თავს საფრანგეთის, ბრიტანეთის, კანადის და სხვა ქვეყნების ლიდერები. ვეუბნები პრეზიდენტ მაკრონს, პრემიერ-მინისტრ კარნის და პრემიერ-მინისტრ სტარმერს, როდესაც მასობრივი მკვლელები, მოძალადეები, ჩვილების მკვლელები და გამტაცებლები მადლობას გიხდიან, თქვენ სამართლიანობის არასწორ მხარეს ხართ. კაცობრიობის არასწორ მხარეს და ისტორიის არასწორ მხარეს დგახართ“, – აღნიშნა ნეთანიაჰუმ.
