აშშ-ის და ევროპის ლიდერები იმედოვნებენ, რომ ვატიკანს რუსეთსა და უკრაინას სამშვიდობო მოლაპარაკებებში ჩართავდნენ მას შემდეგ, რაც პრეზიდენტმა დონალდ ტრამპმა განაცხადა, რომ პაპმა ლეო XIV-მ ინტერესი გამოთქვა შეხვედრის გამართვის იდეის მიმართ, რაც იტალიის პრემიერ-მინისტრმა ჯორჯია მელონიმაც დაადასტურა. თუმცა, Bloomberg-ის ცნობით, კრემლი არ არის დაინტერესებული რუსეთის ლიდერის, ვლადიმერ პუტინის ვატიკანში მოლაპარაკებებისთვის გამგზავრებით.
გამოცემის წყაროების ცნობით, რუსი ოფიციალური პირები პუტინის ვატიკანში ან სხვაგან მოლაპარაკებებისთვის ვიზიტს არ გეგმავენ და ამის ნაცვლად, ისინი გასულ კვირას სტამბოლში დაწყებულ ტექნიკურ დონეზე გამართულ მოლაპარაკებებზე არიან ორიენტირებულნი. ამავდროულად, კრემლი ამ მოლაპარაკებების სტამბოლში განახლებასაც ელის.
თუმცა, ევროპელი ოფიციალური პირები აცხადებენ, რომ ვატიკანის, როგორც მოლაპარაკებებში პოტენციური მასპინძლის ან შუამავლის როლის საკითხი ამჟამად განიხილება. მოლაპარაკებები, შესაძლოა, მომავალ კვირას დაიწყოს, თუმცა ეს რუსეთის მონაწილეობის სურვილზეა დამოკიდებული.
გამოცემის თანამოსაუბრეების თქმით, აშშ-ის წარმომადგენლები უკრაინელებთან კონტაქტში არიან, რათა დარწმუნდნენ, რომ მოლაპარაკებები გაიმართება.
პოლიტიკის ექსპერტი სერგეი მარკოვი მიიჩნევს, რომ პუტინი უსაფრთხოების მიზნით იტალიაში, ნატოს წევრ ქვეყანაში, არ გაემგზავრება და რუსეთი ვატიკანს კონფლიქტში ნეიტრალურად არ მიიჩნევს.
საკითხს კიდევ უფრო ართულებს რომის კათოლიკური ეკლესიისა და რუსეთის მართლმადიდებლური ეკლესიის ურთიერთობა: „წყაროების თანახმად, რუსეთის ეკლესია ეწინააღმდეგება ვატიკანის მონაწილეობას სამშვიდობო მოლაპარაკებებში“.
როგორც მედია წერს, გარდა ამისა, იტალია საერთაშორისო სისხლის სამართლის სასამართლოს წევრია, რომელმაც 2023 წლის მარტში პუტინის დაპატიმრების ორდერი გასცა უკრაინაში სავარაუდო ომის დანაშაულებისთვის.
„მაშინაც კი, თუ ყველა ეს ბარიერი დაძლეული იქნება, მოლაპარაკებები ჯერ კიდევ შორს არის შეთანხმების მიღწევისგან, რომელიც ტრამპის, პუტინისა და უკრაინის პრეზიდენტ ზელენსკის მონაწილეობით ომის შეწყვეტის შეთანხმებაზე ხელმოსაწერად შეხვედრას მოითხოვს“, – წერს „ბლუმბერგი“.
ამავდროულად, კრემლთან დაახლოებული სამი პირის თქმით, რუსეთი თურქეთს საუკეთესო ადგილად მიიჩნევს იმ მემორანდუმზე მოლაპარაკებების გასაგრძელებლად, რომელიც განსაზღვრავს სამშვიდობო შეთანხმების პირობებს და რომელიც პუტინმა ტრამპთან შეხვედრის დროს განიხილა.
