მესიმ თავისი საყვარელი გოლი დაასახელა და მას ქველმოქმედებას მოახმარს

ლეგენდარულმა არგენტინელმა ფორვარდმა ლიონელ მესიმ გაამხილა, რომელს გოლს მიიჩნევს თავის კარიერაში უდიადესად. ეს არ არის მისი რომელიმე ცნობილი სოლოგარღვევა ან გოლი მსოფლიო ჩემპიონატზე. საქვემმოქმედო ინიციატივის რანგში, არგენტინის ნაკრების კაპიტანმა აირჩია მის მიერ 2009 წლის ჩემპიონთა ლიგის ფინალში „მანჩესტერ იუნაიტედის“ კარში თავით გატანილი გოლი. პროექტი სახელწოდებით „გოლი ცხოვრებაში“, რომელიც Inter Miami CF Foundation-ის მიერ არის ორგანიზებული, აერთიანებს სპორტს, ხელოვნებასა და სოციალურ ზემოქმედებას და აგროვებს თანხებს განმანათლებელი პროგრამებისთვის ღარიბ რაიონებში.

ამ გოლმა, რომელიც მესიმ 2009 წლის 27 მაისს რომის „ოლიმპიკოზე“ გაიტანა, გაამყარა „ბარსელონას“ გამარჯვება და ისტორიული სეზონის მწვერვალი გახდა, რომელიც ტრებლის მოგებით დასრულდა. მესი 2.7 მეტრზე ახტა, რათა ჩავის პასისთვის მიმართულება შეეცვალა და იდეალური თავური დარტყმით ბურთი ედვინ ვან დერ სარის კარში ჩაუშვა – ეს მომენტი „ბარსელონას“ ოქროს ეპოქის ერთ-ერთი სიმბოლო გახდა.

„იმის გამო, რას ნიშნავდა და რა მომენტში იყო გატანილი – ეს ყოველთვის ჩემი საყვარელი გოლი იქნება. ეს იყო დაუჯერებელი სეზონის იდეალური ფინალი. ყოფილა სხვა გოლებიც, უფრო ლამაზიც ან ემოციურიც, მაგრამ ჩემთვის ეს ყველაზე მნიშვნელოვანია“, – აღიარა მესიმ.

ახლა, ეს გოლი ხელოვნური ინტელექტის დახმარებით, გარდაიქმნება ხელოვნების უნიკალურ ციფრულ ნაწარმოებად თურქული წარმოშობის ამერიკელი მხატვრის რეფიკ ანადოლის მიერ. ბიოსენსორების, პროგრამული უზრუნველყოფისა და ეპიზოდის დეტალური მონაცემების გამოყენებით, ანადოლი აღადგენს ამ მომენტს უნიკალური ვიზუალური და ემოციური ნაწარმოების სახით, რომელსაც Christie’s-ის აუქციონზე გამოიტანენ. მიღებულ თანხას გამოიყენებენ საგანმანათლებლო და ინკლუზიური სოციალური პროგრამების დასახმარებლად.

არტ-ობიექტის პრემიერა ონლაინ 11 ივნისს შედგება, 15-დან 22 ივლისამდე კი მას წარადგენენ ნიუ იორკში. აუქციონი Christie’s-ის ციფრულ პლატფორმაზე გაიმართება. ამ საქველმოქმედო პროექტისთვის უეფა-მ ვიდეომასალების გამოყენებისთვის ყველა საჭირო უფლება გადასცა ორგანიზატორებს.

კამპანიის პრომორგოლმა, რომელსაც მსახიობი მორგან ფრიმანი ახმოვანებს, უკვე 50 მილიონზე მეტი ნახვა აქვს Instagram-ში. ესპანურენოვანი ბაზრებისთვის კადრსმიღმა ტექსტს კითხულობს გილერმო ფრანჩელა. გულშემატკივრები და ჟურნალისტები სხვადასხვა პროგნოზს აკეთებდნენ მესის არჩევანზე – ვიღაც ელოდა, რომ ეს იქნებოდა მისი მეორე გოლი საფრანგეთთან მსოფლიოს ჩემპიონატის ფინალში, ან დიეგო მარადონას სტილში სოლოგარღვევა „ხეტაფეს“ წინააღმდეგ… მაგრამ მესის საბოლოო არჩევანი გაკეთებულია პირადი და სიმბოლური მნიშვნელობით.

„ეს გოლი მხოლოდ მოგონება არ არის. ეს გზავნილია. ეს გოლი იმაზეა, რას მივაღწიეთ ერთად, როგორც გუნდმა, ახლა კი ის არის გოლი სხვების დასახმარებლად. ეს კიდევ უფრო განსაკუთრებულს ხდის მას“, – აღნიშნა არგენტინელმა ფეხბურთელმა.