ციხეებში 2003-2012 წლებში ნაციონალური მოძრაობის რეჟიმის დროს არსებული რეალობა შეაფასა პარლამენტის საგამოძიებო კომისიის სხდომაზე კომისიის წევრმა, „ხალხის ძალის“ აღმასრულებელმა მდივანმა გურამ მაჭარაშვილმა და განაცხადა, რომ რეალობა ნაცრეჟიმის სიმბოლოებში აისახა. მისი თქმით, თუ აქამდე ნაციონალური მოძრაობის სიმბოლო იყო ცოცხი, ამიერიდან, მას დაემატება „კაციჭამია ფლოსტები“.
„ბევრი სიმბოლო აქვს ნაციონალური მოძრაობას, როგორც დამნაშავე სისტემის შემქმნელ რეჟიმს მინიჭებული, მათ შორის, ევროპული სასამართლოს მხრიდან. ცოცხიც მათი სიმბოლოა, ღალატიც, სამწუხაროდ. დღეიდან ერთი სიმბოლოც დაემატება. ყოველგვარი სარკაზმის გარეშე – კაციჭამია ფლოსტებიც მათი სიმბოლო იქნება, რომელიც კომისიის სხდომაზე აქამდე მოსული ადამიანებისთვისაც იქნებოდა რეალობა. რეალურად ხდებოდა ის, რომ ფლოსტები ისტუმრებდა ადამიანებს ციხეებიდან – ზოგს ცოცხალს და ზოგს მკვდარს.
ახალი სიმბოლო, ცოცხებთან ერთად, ამ რეჟიმის დამახასიათებელი იქნება. ცოცხი რეალობაა, კი არავის გამოუგონებია. რეალობა აისახა სიმბოლოში და შესაბამისად, დღევანდელი ახსნა-განმარტების შემდეგ, ნაციონალურ მოძრაობას დაემატება კიდევ ერთი სიმბოლო – კაციჭამია ფლოსტები“, – განაცხადა კომისიის სხდომაზე გურამ მაჭარაშვილმა.
ცნობისთვის, ტერმინი „კაციჭამია ფლოსტები“ დღეს კომისიის სხდომაზე ალექსანდრე მეგუთნიშვილმა ახსენა, როცა ციხეში არსებულ ყოფას შეეხო. ფლოსტები ის უცვლელი ატრიბუტი იყო, რომელიც საკანში პატიმარს ხვდებოდა და რომელსაც ხშირ შემთხვევაში, სხვადასხვა დანიშნულებით იყენებდნენ, მათ შორის ბალიშად.
