ხვიჩა კვარაცხელია: საქართველომ ბევრი რამ მომცა, ვამაყობ, რომ ქართველი ვარ, მინდა, ჩემს ქვეყანას დავეხმარო

„პარი სენ-ჟერმენის“ ფეხბურთელმა ხვიჩა კვარაცხელიამ Sky Sport-თან მოკლე კომენტარი გააკეთა.

როგორც მან აღნიშნა, ყველაფერი ძალიან სწრაფად მოხდა და ბედნიერია, რომ ჩემპიონთა ლიგის ფინალში ითამაშებს.

„როდესაც პსჟ-სთან კონტრაქტი გავაფორმე, ვერასდროს წარმოვიდგენდი, რომ ყველაფერი ასე სწრაფად მოხდებოდა, ძალიან ბედნიერი ვარ, რომ ფინალში ვითამაშებ, ეს ოცნებაა. თბილისიდან გრძელი მოგზაურობა იყო, რთული მომენტებიც გამოვიარე, მაგრამ გადავლახე და ყველა ფეხბურთელის კარიერაში ძალიან მნიშვნელოვანია ამის გაკეთება.

საქართველო ყოველთვის ჩემთან ერთადაა, საქართველომ ბევრი რამ მომცა, ვამაყობ, რომ ქართველი ვარ, მინდა, ჩემს ქვეყანას დავეხმარო. ქართველი ფეხბურთელებისთვის დიდ ლიგებში თამაში რთულია, ამიტომ, ვცდილობ, ეს ყველაფერი შეიცვალოს.

„ინტერთან“ მითამაშია, მაგრამ ამ მხრივ არ მგონია, ლუის ენრიკეს ჩემი დახმარება სჭირდებოდეს. ის და მისი სტაფი უყურებენ მატჩებს და ჩემზე მეტად იციან, რა არის საჭირო. თუმცა, მეც ვიცი, რამდენად ძლიერია „ინტერი“, თუ ჩემი დახმარება დასჭირდებათ, მზად ვიქნები.

დიახ, მართალია, ფაბიან რუისთან და ჯიჯო დონარუმასთან ერთად „ნაპოლის“ თამაშებს ვუყურებ. ჩვენ გვიყვარს „ნაპოლი“. ვფიქრობ, ეს გუნდი სკუდეტოს მოიგებს და ნეაპოლელი ხალხისთვის დამსახურებული ზეიმი იქნება“, – განაცხადა კვარაცხელიამ.