აშშ-ის პრეზიდენტი დონალდ ტრამპი და სახელმწიფო მდივანი მარკო რუბიო აშშ-ის ეროვნული უშიშროების საბჭოში მასშტაბურ რესტრუქტურიზაციას ატარებენ, მის რაოდენობას ამცირებენ და საბჭოს უფლებამოსილებათა ნაწილი აშშ-ის სახელმწიფო დეპარტამენტს და თავდაცვის სამინისტროს გადასცეს. ამის შესახებ გამოცემა axios იუწყება.
თეთრი სახლი უშიშროების საბჭოს ძალზე ბიუროკრატიულ ორგანოს უწოდებს, სადაც მრავლადაა ძველი ჩინოვნიკი, რომლებიც პრეზიდენტის შეხედულებებს არ იზიარებენ.
თეთრი სახლის ერთ-ერთმა მაღალჩინოსანმა უშიშროების საბჭოს რეორგანიზაციას უწოდებს ტრამპის და რუბიოს მორიგ ნაბიჯს Deep State-ის წინააღმდეგ.
„უშიშროების საბჭო არის Deep State. მარკო რუბიო Deep State-ს ებრძვის. უნდა გამოვშიგნოთ ეს Deep State“, – ამბობს თეთრი სახლის მაღალჩინოსანი. მისი თქმით, უშიშროების საბჭოს 350 თანამშრომლიდან ნახევარი სამსახურიდან დათხოვნილი იქნება. ისინი უმუშევრები არ დარჩებიან, გათავისუფლებულ თანამშრომლებს მთავრობაში სხვა პოზიციებზე გადაიყვანენ.
ეროვნული უშიშროების საბჭოს ოპტიმიზაცია მის თავდაპირველ დანიშნულებას და პრეზიდენტის ხედვას სრულად შეესაბამება. რეფორმირების შემდეგ უშიშროების საბჭო კოორდინაციის და კონსულტაციის საქმიანობით იქნება დაკავებული, ხოლო პოლიტიკის გატარების ფუნქცია მას აღარ ექნება, ტრამპის ადმინისტრაციაში ამბობენ, რომ უშიშროების საბჭოს ბიუროკრატია აშშ-ის სხვა პრეზიდენტებისთვის, შესაძლოა, მართლაც იყო მნიშვნელოვანი, რადგანაც სხვადასხვა სამინისტროების და უწყებების ხელმძღვანელები ერთმანეთთან დაპირისპირებულები იყვნენ. ტრამპის შემთხვევაში ასე არ ხდება.
„თუ თქვენ გყავთ ჩინოვნიკები, რომლებიც მუდმივად ებრძვიან ერთმანეთს გავლენის სფეროების მოსაპოვებლად, მაშინ ასეთი სტრუქტურა გჭირდებათ. რაც შეეხება ტრამპის გუნდს, აქ ყველა – სახელმწიფო მდივანი რუბიო, ფინანსთა მინისტრი ბესენტი, თავდაცვის მინისტრი ჰეგსეტი, გენერალური პროკურორი ბონდი – ყველა ერთი გუნდის წევრია და შეთანხმებულად მოქმედებს“, – განუცხადა გამოცემას ინფორმირებულმა წყარომ.
ამავე ინფორმაციის მიხედვით, მარკო რუბიო მომავალშიც შეასრულებს უსაფრთხოების საკითხებში ტრამპის მრჩევლის ფუნქციას და ტრამპს სურს, რომ რუბიო იქ რაც შეიძლება დიდი ხნის განმავლობაში დარჩეს. ტრამპი რუბიოს მუშაობით კმაყოფილია და მას ენდობა.
