ევროკავშირი SWIFT-ის საგადამხდელო სისტემიდან 20 ბანკის გათიშვის შესაძლებლობას განიხილავს. ამის შესახებ სააგენტო Bloomberg იუწყება.
სანქციების განხილვა კონფიდენციალურ ფორმატში მიმდინარეობს. ამ საკითხზე ორგანიზაციის წევრ ქვეყნებთან კონსულტაციები მიმდინარეობს. გადაწყვეტილების მისაღებად ევროკავშირის ყველა წევრის თანხმობაა აუცილებელი.
ასევე, იგეგმება ოცამდე ბანკისთვის ტრანზაქციებზე დამატებითი აკრძალვების დაწესება და 2,5 მლრდ ევრომდე სავაჭრო შეზღუდვების შემოღება. ამის მიზანია რუსეთის შემოსავლების შემცირება, რათა მან იარაღის წარმოებისთვის აუცილებელი ტექნოლოგიები ვერ მიიღოს.
ახალ პაკეტში განიხილება, ასევე, „ჩრდილოეთ ნაკადების“ მშენებლობის საბოლოო აკრძალვა და რუსულ ნავთობზე ზღვრული ფასის შემცირება 45 აშშ დოლარამდე.
ამ ეტაპზე, რუსულ ნავთობზე ფასი 60 დოლარის ფარგლებშია დაწესებული. ფასის დაწევას, სავარაუდოდ, აშშ-ის თანხმობაც დასჭირდება. ჯერჯერობით, ამ საკითხზე „დიდი შვიდეულის“ ფინანსთა მინისტრებმა შეთანხმებას ვერ მიაღწიეს.
რუსეთის წინააღმდეგ ახალი სანქციების დაწესების საკითხი აშშ-ის პრეზიდენტის დონალდ ტრამპის მოწოდებების პარალელურად განიხილება, ტრამპი მოუწოდებს მოსკოვსა და კიევს, რომ მათ პირდაპირი დიალოგი დაიწყონ და სამშვიდობო შეთანხმებას მიაღწიონ. ამ ეტაპზე, ტრამპი რუსეთის წინააღმდეგ ახალ სანქციებს არ აწესებს, მაგრამ ჯო ბაიდენის დროს დაწესებული სანქციები ძალაში რჩება.
დატოვეთ კომენტარი