დიდი ბრიტანეთის ქალაქ ლივერპულში ფეხბურთის გულშემატკივრების ბრბოში ავტომობილის შევარდნის შედეგად 27 ადამიანი საავადმყოფოში გადაიყვანეს, მათგან ორი მძიმედ დაშავდა. ინფორმაციას სააგენტო Reuters ავრცელებს.
ინციდენტი 26 მაისს, პრემიერ ლიგის საფეხბურთო ჩემპიონატის აღსანიშნავი აღლუმის დროს მოხდა. პოლიციის განცხადებით, დაკავებულია „53 წლის თეთრკანიანი ბრიტანელი მამაკაცი ლივერპულის რაიონიდან“, რომელიც, მათი თქმით, იმ მანქანის მძღოლია, რომელიც ადგილობრივი საფეხბურთო კლუბის ჩემპიონობის აღნიშვნისას გულშემატკივრების დიდ ჯგუფს შეეჯახა.
ოც ადამიანს სამედიცინო დახმარება ადგილზე გაეწია. სასწრაფო დახმარების თანამშრომლების ცნობით, საავადმყოფოში გადაყვანილი 27 ადამიანიდან ოთხი ბავშვია. ერთი ბავშვი და ერთი ზრდასრული მძიმე მდგომარეობაში არიან. ავტომობილის ქვეშ მოყოლილი ოთხი ადამიანი მეხანძრე მაშველებმა გამოიყვანეს.
სოციალურ ქსელში გავრცელებულ კადრებში ჩანს, როგორ ვარდებიან ადამიანები ჰაერში, როდესაც მანქანა გამვლელებს ეჯახება.
როდესაც მანქანა გაჩერდა, გაბრაზებულმა გულშემატკივრებმა მას ალყა შემოარტყეს და ფანჯრების ჩამსხვრევა სცადეს, რა დროსაც პოლიციის თანამშრომლები ჩაერივნენ, რათა მათთვის მძღოლთან მიახლოების საშუალება არ მიეცათ.
„ჩვენ გვჯერა, რომ ეს იყო იზოლირებული ინციდენტი და ამ დროისთვის ჩვენ არ ვეძებთ სხვა ვინმეს ამ ინციდენტთან დაკავშირებით. ეს ინციდენტი არ განიხილება, როგორც ტერორიზმი“, – განუცხადა ჟურნალისტებს პოლიციის უფროსის მოვალეობის შემსრულებელმა ჯენი სიმსმა.
დიდი ბრიტანეთის პრემიერ-მინისტრმა კირ სტარმერმა ლივერპულში მომხდარს „საშინელება“ უწოდა.
„ჩემი ფიქრები ყველა დაშავებულთან, ან დაზარალებულთანაა. მინდა მადლობა გადავუხადო პოლიციას და სასწრაფო დახმარების სამსახურებს ამ შოკის მომგვრელ ინციდენტზე სწრაფი და მიმდინარე რეაგირებისთვის. მოვლენების განვითარების შესახებ ინფორმაციას ვიღებ და გთხოვთ, პოლიციას მივცეთ გამოძიების ჩასატარებლად საჭირო სივრცე“, – წერს სტარმერი X-ზე.
ინციდენტს თავად საფეხბურთო კლუბიც გამოეხმაურა და განაცხადა, რომ პოლიციასთან პირდაპირ კონტაქტშია.
„ჩვენი ფიქრები და ლოცვები იმ ადამიანებთანაა, რომლებიც ამ სერიოზული ინციდენტის შედეგად დაზარალდნენ“, – განაცხადა „ლივერპულის“ საფეხბურთო კლუბმა.
