„[2008 წლის] 7 აგვისტოს, 5 საათზე დამიბარა პრეზიდენტმა მიშა სააკაშვილმა, მაშინ უკვე პოპოვთან კონფლიქტი იყო და ჩოჩიევთან შეხვედრა ვერ მოახერხეს და ასე მითხრა, რომ ახლა მეც განცხადებას ვაკეთებ, რომ სიტუაცია დავამშვიდოთ, იქნებ თქვენც გააკეთოთ მიმართვა იმ ოსების მიმართ. თუ კიდევ დღეს რამე დარღვევა მოხდება, ეგრევე უნდა შევიდეთო [ცხინვალში]“, – ამის შესახებ 2006-2022 წლებში სამხრეთ ოსეთის ადმინისტრაციის ხელმძღვანელმა დიმიტრი სანაკოევმა, საქართველოს პარლამენტის დროებითი საგამოძიებო კომისიის სხდომაზე განაცხადა.
მისი თქმით, მიხეილ სააკაშვილს განუცხადა, რომ სწორედ, ქართველების ცხინვალში შესვლას ელოდნენ რუსები და მათ გეგმაც ჰქონდათ, ქართული ჯარის შესვლის შემთხვევაში რა უნდა გაეკეთებინათ, თუმცა, მაშინდელი პრეზიდენტისგან მიიღო პასუხი, რომ უკვე ყველაფერი შეთანხმებული იყო.
„ვუპასუხე, ზუსტად ამას ელოდებიან რუსები-მეთქი, რომლებიც ამზადებდნენ გეგმას, ქართული ჯარი რომ შევა, რა უნდა გააკეთონ იქაურებმა. რუსები ამას ცდილობენ და ზუსტად ასე ვუთხარი. [სააკაშვილმა მიპასუხა] ყველაფერი შეთანხმებულია უკვე, ნუ გეშინიაო.
ვიცოდი, რომ რუსები ამზადებდნენ ოსებს, შეიარაღებულ ძალოვნებს. რუსები იძახდნენ, ქართული ჯარისკაცები და ტანკები რომ შემოვლენ, ამ ადგილზე უნდა იყოთ. ერთი დღე გინდათ თქვენ, რომ აქ იომოთ და მერე ჩვენც ჩამოვალთო“, – განაცხადა დიმიტრი სანაკოევმა.
დატოვეთ კომენტარი