უკრაინის პრეზიდენტი ვოლოდიმირ ზელენსკი აღნიშნავს, რომ მსოფლიო საზოგადოებამ და კერძოდ, ამერიკის შეერთებულმა შტატებმა, ძალისხმევა რუსეთის მიმართ ზეწოლაზე უნდა მიმართოს და არა – „დიალოგზე“. მისი თქმით, მხოლოდ ძალის დემონსტრირებით შეიძლება რუსეთის მხრიდან მშვიდობიანი მოსახლეობის წინააღმდეგ ღამის საჰაერო დარტყმების შეჩერება.
როგორც სახელმწიფოს მეთაურმა სოციალურ ქსელ Facebook-ზე განაცხადა, უკრაინის საჰაერო თავდაცვის ძალები და მაშველები მთელი ღამის განმავლობაში მუშაობდნენ.
„სრულმასშტაბიანი ომის დაწყების შემდეგ რუსეთის არმიამ ჩვენი ქალაქებისა და თემების წინააღმდეგ ყველაზე მეტი დრონი გამოიყენა. 355 მოიერიშე დრონი, რომელთა უმეტესობა „შაჰედებია“. ასევე, გამოიყენეს 9 ფრთოსანი რაკეტა. სამწუხაროდ, არიან დაჭრილები და დაზიანებულია სამოქალაქო ინფრასტრუქტურა“, – აღნიშნა ზელენსკიმ.
უკრაინის პრეზიდენტის თქმით, მხოლოდ სრული დაუსჯელობის განცდას შეუძლია, რუსეთს ასეთი დარტყმების განხორციელების და მათი მასშტაბის გაზრდის უფლება მისცეს.
„ამაში რეალური სამხედრო ლოგიკა არ არსებობს, მაგრამ არსებობს მნიშვნელოვანი პოლიტიკური აზრი. ამ გზით პუტინი აჩვენებს, თუ რამდენად სძულს მას მსოფლიო, რომელიც უფრო მეტ ძალისხმევას ხარჯავს მასთან „დიალოგზე“, ვიდრე რეალურ ზეწოლაზე“, – ხაზგასმით აღნიშნა ზელენსკიმ.
ამასთან დაკავშირებით, სახელმწიფოს მეთაური აღნიშნავს, რომ ნებისმიერი კრიმინალის მსგავსად, რუსეთის ჩარჩოებში მოქცევა მხოლოდ ძალის გამოყენებით შეიძლება.
„მხოლოდ ძალით – შეერთებული შტატების ძალით, ევროპის ძალით, ყველა იმ ერის ძალით, რომლებიც სიცოცხლეს პატივს სცემენ – შეგვიძლია მივაღწიოთ ამ დარტყმების სრულ შეწყვეტას და რეალურ მშვიდობას. რუსული დარტყმების ზრდას სანქციების გაძლიერებით უნდა ვუპასუხოთ. რუსეთის მიერ დიპლომატიის უგულებელყოფას და ცეცხლის შეწყვეტაზე უარის თქმასაც კი უნდა ვუპასუხოთ რუსული ფინანსებისა და რუსული ნავთობით ვაჭრობის ბლოკირებით“, – აცხადებს ზელენსკი.
მან მადლობა გადაუხადა მსოფლიოში ყველას, ვინც სწორედ ამ ტიპის ძლიერ დღის წესრიგს უჭერს მხარს.
„რუსეთმა თავისი ომი უნდა დაასრულოს და იმისათვის, რომ ეს მოხდეს, მათ უნდა ჩამოვართვათ ის რესურსები, რომლებიც მათი ბრძოლის სურვილს აღვივებს“, – დასძინა პრეზიდენტმა.
