რამდენი ხანი დასჭირდება რუსეთს ევროპაზე თავდასხმისთვის? – უკრაინის საგარეო დაზვერვის სამსახურის ხელმძღვანელის პროგნოზი

უკრაინაში ომის დასრულებიდან 2-4 წლის შემდეგ, რუსეთი ტექნიკურად მზად იქნება ევროპის წინააღმდეგ აგრესიისთვის, – ამის შესახებ უკრაინის საგარეო დაზვერვის სამსახურის ხელმძღვანელმა ოლეგ ივაშჩენკომ „უკრინფორმთან“ ინტერვიუში განაცხადა.

მისი თქმით, „უკრაინა არ არის მხოლოდ საკუთარი თავისთვის მებრძოლი ქვეყანა“, არამედ „ევროპის ფარია“ და სანამ ის რუსეთის შეჭრას აკავებს, სხვა ქვეყნებს მომზადების დრო აქვთ, რადგან რუსეთს არა მხოლოდ უკრაინაზე სრული კონტროლი და პოსტსაბჭოთა ქვეყნებზე გავლენა სურს, არამედ სხვა ევროპულ ქვეყნებზე თავდასხმასაც ამზადებს.

„დროის საკითხია, თუ ვინ იქნება შემდეგი. პოლონეთი, ბალტიისპირეთის ქვეყნები, ჩრდილოეთ ევროპა რისკის ქვეშ არიან. ჩვენი ანალიტიკოსები აღარ კითხულობენ, გაბედავს თუ არა რუსეთი სხვა ქვეყნებზე თავდასხმას. კითხვები განსხვავებულია. როდის და საიდან?“ – აღნიშნა ივაშჩენკომ.

საგარეო დაზვერვის ხელმძღვანელი მიიჩნევს, რომ რუსეთი ევროპის წინააღმდეგ აგრესიისთვის 2-4 წელიწადში მოემზადება, ხოლო თუ სანქციები მოიხსნება, მაშინ კიდევ უფრო სწრაფად.

„ჩვენი პროგნოზების თანახმად, რომლებსაც ევროპელი კოლეგებიც იზიარებენ, საომარი მოქმედებების დასრულების შემდეგ რუსეთს საბრძოლო შესაძლებლობების აღსადგენად 2-4 წლამდე დასჭირდება. თუ სანქციები მოიხსნება, გადაიარაღების პროცესი გაცილებით სწრაფად წავა“, – აღნიშნა მან.

მისი თქმით, ახლა რუსეთი ჰიბრიდულ თამაშს თამაშობს, რათა „მოკავშირეები გაწყვიტოს, უკრაინის მხარდაჭერა შეამციროს და უნგრეთის მეშვეობით გადაწყვეტილებებზე გავლენა მოახდინოს“.

ივაშჩენკოს თქმით, არმიის ბაზების გაფართოება იმაზე მიუთითებს, რომ რუსეთის ფედერაცია ნატოს ქვეყნებზე თავდასხმისთვის ემზადება.

„რუსეთი ემზადება. იქნება ოპერატიული მიმართულება – კოლას ნახევარკუნძული, ფინეთი. ამ მიმართულებით ჩვენ ვხედავთ ახალი სამხედრო ნაწილების მშენებლობას. რაც შეეხება ლიანდაგებს, ეს არის ინფრასტრუქტურის გაფართოება, რომლის გამოყენება შესაძლებელია როგორც მშვიდობიანი, ასევე, სამხედრო მიზნებისთვის“, – განმარტა მან.

ივაშჩენკოს თქმით, რუსეთი ამ ეტაპზე ომის შეჩერებას არ აპირებს, მიუხედავად დანაკარგებისა, რომელსაც განიცდის.

„ისინი ქმნიან ახალ ოლქებსა და დივიზიებს. უფრო ზუსტად, 13 დივიზიას. დიახ, მათ აქვთ პრობლემები – აკლიათ ხალხი, ტექნიკა. მაგრამ ყოველდღიურად – 1 000-1 200 ახალი კონტრაქტორი ჯარისკაცი ჰყავთ. ეს არ არის მშვიდობისთვის მობილიზაცია, არამედ უფრო დიდი რამისთვის მზადებაა“.