თურქეთის პრეზიდენტმა რეჯეფ თაიფ ერდოღანმა უკრაინის ლიდერ ვოლოდიმირ ზელენსკისთან სატელეფონო საუბრისას განაცხადა, რომ უკრაინისა და რუსეთის დელეგაციებს შორის მოლაპარაკებების დასრულების შემდეგ, მშვიდობისკენ მიმავალ გზაზე შემდეგი ნაბიჯი სახელმწიფო მეთაურების დონეზე შეხვედრა უნდა იყოს. ამის შესახებ თურქეთის რესპუბლიკის პრეზიდენტის ადმინისტრაციის პრესსამსახურის მიერ გავრცელებულ განცხადებაშია ნათქვამი.
ანკარის განცხადების თანახმად, საუბრისას ერდოღანმა ხაზგასმით აღნიშნა, რომ სტამბოლში დაგეგმილი მოლაპარაკებების მეორე რაუნდის დროს ცეცხლის შეწყვეტის შესახებ შესაძლო განხილვა, შესაძლოა, სამშვიდობო პროცესის წინსვლის მნიშვნელოვან ეტაპს წარმოადგენდეს.
„ერდოღანი დარწმუნებულია, რომ დელეგაციების დონეზე მოლაპარაკებების დასრულების შემდეგ, ქვეყნების ლიდერებს შორის პირდაპირი დიალოგის ეტაპი უნდა დაიწყოს – და ეს ნაბიჯი ყოველგვარი განსაკუთრებული შეფერხების გარეშე უნდა გადაიდგას“, – წერს პრესსამსახური.
თავის მხრივ, ზელენსკიმ, ასევე, გაავრცელა ინფორმაცია ერდოღანთან საუბრის შესახებ.
„ჩვენ ვისაუბრეთ სტამბოლში გამართულ პირველ შეხვედრაზე. პატიმრების გაცვლა მისი მნიშვნელოვანი მიღწევაა, მაგრამ, სამწუხაროდ, ერთადერთი. მშვიდობისკენ შემდგომი მოძრაობისთვის აუცილებელია ცეცხლის შეწყვეტა. ადამიანების მკვლელობა უნდა შეწყდეს“, – წერს ის.
მისი თქმით, თურქეთის პრეზიდენტთან, რეჯეფ თაიფ ერდოღანთან სატელეფონო საუბრისას უკრაინისა და რუსეთის დელეგაციებს შორის სტამბოლში მომდევნო შეხვედრის გამართვის შესაძლებლობა განიხილა.
„ვიზიარებთ მოსაზრებას, რომ არ შეიძლება ეს შეხვედრა უშედეგო იყოს. ასევე, განვიხილეთ ოთხმხრივი შეხვედრის ორგანიზების შესაძლებლობა უკრაინის, რუსეთის, თურქეთისა და აშშ-ის ლიდერების დონეზე“, – აღნიშნავს უკრაინის პრეზიდენტი.
