მღვდელი განმარტავს, რომ ეკლესიაში არ არსებობს ისეთი ცნება, როგორიცაა „საეკლესიო განქორწინება“. ეკლესია ვერ „შლის“ ქორწინებას. თუმცა გამონაკლის შემთხვევებში, მოქმედი მღვდელმთავრის, ეპისკოპოსის, არქიეპისკოპოსის ან მიტროპოლიტის კურთხევით, შეიძლება გაიცეს ნებართვა მომდევნო ქორწინებაზე.
ეკლესია ვერ აუქმებს ჯვრისწერას, რადგან ბიბლიაშიც წერია: „რაც ღმერთმა შეაერთა, კაცმა ნუ განაშოროს“. ჯვრისწერის საიდუმლო სწორედ ის მომენტია, როდესაც ქალი და კაცი ერთ მთლიანობად ერთიანდებიან და ადამიანს ამის გაუქმება არ შეუძლია. ამიტომაც უმთავრესია, რომ ჯვრისწერა იყოს ნამდვილად გააზრებული და პასუხისმგებლიანი არჩევანი.
შესაძლებელია თუ არა საჭიროების შემთხვევაში მეორედ ჯვრისწერა. ამისთვის პირველ რიგში აუცილებელია სახელმწიფო ქორწინების ოფიციალური განქორწინების დოკუმენტი, რომელიც ადასტურებს, რომ ადამიანები უკვე აღარ ცხოვრობენ ერთად. ამის შემდეგ უნდა მიმართონ მოქმედ მღვდელმთავარს მეორე ქორწინებაზე კურთხევის მისაღებად. მეორე ჯვრისწერის დროს წყვილზე იკითხება განსხვავებული ლოცვები, არა ისეთები, როგორც პირველ ჯვრისწერაზე.
კანონიკურად ეკლესიაში არსებობს მეორედ და მესამედ დაქორწინებულთა ჯვრისწერა. ანუ, ჯვრისწერა ადამიანის ცხოვრებაში მაქსიმუმ სამჯერ არის დასაშვები.
