უნგრეთის გუშინდელი საპარლამენტო არჩევნების შემდეგ ვიქტორ ორბანის ოპოზიციის ლიდერის, პიტერ მადიარის პარტია, “ტისა“ ქვეყნის პარლამენტში, სავარაუდოდ, უმრავლესობას მოიპოვებს.
პიტერ მადიარის შესახებ ქონებრივ ინფორმაციას ეკონომიკური პორტალი „ბიზნესპრესნიუსი“ ავრცელებს.
პიტერ მადიარი 2024 წლიდან ევროპარლამენტის წევრია და უნგრეთის პოლიტიკურ წრეებში კარგად ცნობილი ოჯახიდანაა. დედის მხრიდან ნათესავები ქვეყნის ყოფილი პრეზიდენტი, ფერენც მადლი და უზენაესი სასამართლოს მოსამართლე, პალ ერიოსია.
პეტერ მადიარი 45 წლისაა. ის 1981 წლის 16 მარტს, ბუდაპეშტში, იშტვან მადიარისა და მონიკა ეროშის ოჯახში დაიბადა. მისი დედის მხრიდან დიდი ბიძა, ფერენც მადლი უნგრეთის პრეზიდენტი 2000 წლიდან 2005 წლამდე იყო. ასევე, დედის მხრიდან ბაბუა, პალ ერიოსი უზენაესი სასამართლოს ყოფილი მოსამართლეა. მადიარის დედაც მოსამართლეა. 2020 წლის აპრილში ის უნგრეთის სასამართლოს ეროვნული საბჭოს თავმჯდომარის მოადგილე გახდა. მამა დიდი ხნის განმავლობაში ადვოკატად მუშაობდა.
ევროპარლამენტში 2024 წელს წარდგენილი დეკლარაციის თანახმად, პიტერ მადიარი ბუდაპეშტში, კუტვოლდის ქუჩაზე მდებარე 141 კვ.მ. ბინაში ცხოვრობს, რომელსაც თანაცხოვრების პერიოდში მის მაშინდელ მეუღლესთან, იუსტიციის ყოფილ მინისტრ იუდიტ ვარგასთან ერთად თანასაკუთრებაში ფლობდა. 2023 წელს, მათი განქორწინების შემდეგ ქონება მთლიანად მისი გახდა.
2019 წლის ივნისიდან 2022 წლის თებერვლამდე სტუდენტური სესხების ცენტრის (Diakhitel Kozpont Zrt.) აღმასრულებელი დირექტორის თანამდებობაზე მუშაობისას მადიარი თვეში, თითქმის, 8 600 ევროს გამოიმუშავებდა. ის, ასევე, უნგრეთის საზოგადოებრივი გზების კომპანიის (Hungarian Public Roads) დირექტორთა საბჭოს წევრი იყო, რომლის ყოველთვიური შემოსავალი, დაახლოებით, 980 ევროს შეადგენდა.
2022 წლის აგვისტოდან 2024 წლის თებერვლამდე მან საზოგადოებრივი გზებისა (Magyar Kozut) და საქალაქთაშორისო ავტობუსების სატრანსპორტო (Volanbusz) სახელმწიფო კომპანიების დირექტორთა საბჭოს თანამდებობებზე, თითქმის, 31 500 ევრო გამოიმუშავა
2021-2024 წლების პერიოდში მადიარი შემოსავალს იღებდა კომპანიებისგან, Hiventures Zrt.(თვეში 1100 ევრომდე) და MBH Bank Nyrt (4105 ევრო).
ის, ასევე, სახელმწიფო საკუთრებაში არსებული სამშენებლო, განვითარებისა და სპორტული ობიექტების ოპერირების კომპანია BMSK Zrt-ის სამეთვალყურეო საბჭოს წევრი იყო, სადაც 2023 წლის იანვარში მის დახურვამდე ბოლო ხუთი თვის განმავლობაში მუშაობდა. ამ თანამდებობაზე მისი ანაზღაურება თვეში, დაახლოებით, 860 ევროს შეადგენდა, რამაც სამუშაო პერიოდში მთლიანობაში, დაახლოებით 4.300 ევრო შეადგინა.
