ჩინეთში კაცს თორმეტგოჯა ნაწლავიდან ვერცხლისწყლის თერმომეტრი ამოუღეს. საგანი მის ორგანიზმში 20 წლის განმავლობაში იმყოფებოდა, – იუწყება South China Morning Post.
გამოცემის ინფორმაციით, 32 წლის პაციენტმა კლინიკას მუცლის არეში ტკივილის ჩივილებით მიმართა. გამოკვლევამ აჩვენა, რომ დისკომფორტის მიზეზი თერმომეტრი იყო, რომელიც ერთი ბოლოთი ნაწლავის კედელს აწვებოდა.
კაცმა თქვა, რომ ის შემთხვევით დაახლოებით 20 წლის წინ გადაყლაპა. ბავშვობაში მას მშობლების რეაქციის შეეშინდა და ინციდენტის დამალვა გადაწყვიტა. დროთა განმავლობაში პაციენტს მომხდარი დაავიწყდა, ამიტომ გაოცდა, როცა გაიგო, რომ თერმომეტრი კვლავ მის ორგანიზმში იყო.
თერმომეტრის მდებარეობა პერფორაციისა (გახვრეტის) და შინაგანი სისხლდენის საფრთხეს ქმნიდა. ექიმებმა უცხო სხეულის ამოსაღებად სასწრაფო ოპერაცია ჩაატარეს. თერმომეტრის მთლიანად ამოღება მოხერხდა, თუმცა მედიკოსებმა შენიშნეს, რომ მასზე ტემპერატურის საზომი სკალა სრულიად წაშლილი იყო.
