რუსთავის მერიის გუნდი, კიდევ ერთ მასშტაბურ კულტურულ პროექტზე – ხელოვნების მულტიპროფილური სასახლის კონცეფციაზე მუშაობს.
პროექტი, რუსთავის სამუსიკო სკოლების პედაგოგებს, რუსთავის მერმა ნინო ლაცაბიძემ და საკრებულოს თავმჯდომარე მამუკა რეხვიაშვილმა, კულტურული პროექტების მართვის ცენტრის ხელმძღვანელ ხატია ფოცხვერაშვილთან ერთად წარუდგინეს.
როგორც რუსთავის მერმა ნინო ლაცაბიძემ განაცხადა, 5700 კვადრატული მეტრი ფართის სამსართილიანი ახალი შენობა, ქალაქის 3 სამუსიკო სკოლას, 350 მაყურებელზე გათვლილ საკონცერტო დარბაზს, მუსიკალური ლიტერატურის მედიათეკას, ღია საღონისძიებო სივრცეს, ლაუნჯ ბარს, ხელოვნების რამოდენიმე მიმართულებას, ერთ თანამედროვე, შშმ პირებზე ადაპტირებულ სივრცეში გააერთიანებს.
„ჩვენი გუნდი ვაგრძელებთ რეფორმებს სახელოვნებო განათლების და კულტურული პროექტების მიმართულებით. ძალიან მალე, რუსთავში ხელოვნების მრავალპროფილური სასახლის მშენებლობას დავიწყებთ. ძველი საბჭოთა შენობების ნაცვლად, რომლებიც ვერცერთ სტანდარტს ვეღარ აკმაყოფილებენ, რუსთაველებს ხელოვნების მულტიპროფილური სასახლე გვექნება.
ახალი სივრცე, სულ სხვა პერსპექტივებს გაუხსნის ახალგაზრდებს. ჩვენი ღვაწლმოსილი პედაგოგები, კი ისეთ გარემოში გაზრდიან თაობებს, როგორსაც დიდი ხანია იმსახურებენ”, – განაცხადა რუსთავის მერმა ნინო ლაცაბიძემ.
სასახლის მშენებლობა, რუსთავის მე-4 სამუსიკო სკოლის ავარიული შენობის ადგილზე იგეგმება.
რუსთავის ხელოვნების სასახლე, ქალაქის ახალი განვითარების გეგმის ნაწილია და მის კონცეფციაზე, რუსთავის მერია, დარგის სპეციალისტებთან, რუსთავის სამუსიკო და სახელოვნებო სკოლების პედაგოგებთან ერთად მუშაობს.
