ევროკავშირის ქვეყნებმა რუსეთის მოქალაქეებზე 2025 წელს 620 000-ზე მეტი ვიზა გასცეს, რაც 2024 წელთან შედარებით 10.2 პროცენტით მეტია. ამის შესახებ ინფორმაციას „ევროაქტივი“ ავრცელებს.
გავრცელებული ცნობით, 2025 წელს რუსეთის მოქალაქეებმა შენგენის ვიზაზე 670 000-ზე მეტი განაცხადი შეიტანეს, რაც 2024 წელთან შედარებით თითქმის რვა პროცენტით მეტია.
„ეუროაქტივის“ თანახმად, რუსები სულ უფრო ხშირად ბრუნდებიან ევროპაში დასასვენებლად, მიუხედავად იმისა, რომ ევროკავშირს უკრაინის ომის გამო მოსკოვის წინააღმდეგ მსოფლიოში ერთ-ერთი ყველაზე მკაცრი სანქციები აქვს დაწესებული.
„მონაცემები ასევე ზოგადად ასახავს გეოგრაფიულ უფსკრულს ევროპის აღმოსავლეთ ფლანგიდან შორს მდებარე ქვეყნებს (საფრანგეთი, იტალია და ესპანეთი), რომლებიც რუსეთის მხრიდან ნაკლებად საფრთხეს გრძნობენ და დიდი ხანია, მიესალმებიან იქიდან ინვესტიციებს, და ისეთ სახელმწიფოებს შორის, როგორებიცაა პოლონეთი და ბალტიისპირეთის ქვეყნები, რომლებიც ომს ეგზისტენციალურ ბრძოლად მიიჩნევენ“, – წერს „ევროაქტივი“.
რუსეთის მოქალაქეებზე 477 000-ზე მეტი ტურისტული ვიზა გაიცა, რაც 2025 წელს რუსებისთვის გაცემული ყველა ვიზის დაახლოებით 77 პროცენტს შეადგენს. ოჯახის წევრებთან და მეგობრებთან ვიზიტები მეორე ყველაზე დიდი კატეგორია იყო, რასაც მოსდევდა საქმიანი მოგზაურობები.
„რუსეთის მოქალაქეების მიერ წარდგენილი ვიზების განაცხადების თითქმის სამი მეოთხედი საფრანგეთზე, იტალიასა და ესპანეთზე მოდიოდა. პარიზმა არა მხოლოდ ვიზების ყველაზე მეტი რაოდენობა გასცა, არამედ რუსეთის მოქალაქეებისთვის უფასო საშვების გაცემის მხრივ ყველაზე მკვეთრი ზრდა ჰქონდა, რაც 2025 წელს, 2024 წელთან შედარებით, 23 პროცენტზე მეტით გაიზარდა. 2019 წლის ოფიციალური მონაცემებით, საფრანგეთში 56 000-ზე მეტი რუსი ცხოვრობს, რომელთა მნიშვნელოვანი ნაწილი სამხრეთ-აღმოსავლეთ რივიერაზე ბინადრობს“, – აღნიშნულია სტატიაში.
