ეთიოპიაში 35 წლის ქალმა ერთდროულად ხუთ ჯანმრთელ ჩვილს მისცა სიცოცხლე. 12-წლიანი დამღლელი და უშედეგო მცდელობების შემდეგ, ის სრულიად ბუნებრივი გზით დაორსულდა. ინფორმაციას ამის შესახებ BBC ავრცელებს.
მაისის დასაწყისში ეთიოპიაში, „ჰივოტ ფანას“ სპეციალიზებულ საავადმყოფოში, უნიკალური სამედიცინო შემთხვევა დაფიქსირდა: ადგილობრივმა ქალმა, ნანატრი დედობის 12-წლიანი მოლოდინის შემდეგ, რეპროდუქციული ტექნოლოგიებისა და ხელოვნური განაყოფიერების (ინ-ვიტრო) გარეშე, ხუთი ტყუპისცალი გააჩინა.
საავადმყოფოს მთავარი ექიმის, მუჰამედ ნურ აბდულაჰის თქმით, ბუნებრივი გზით ხუთი ნაყოფის ჩასახვის შანსი დაახლოებით 1-ია 55 მილიონიდან.
ახალშობილები ქვეყნიერებას გეგმური საკეისრო კვეთის შედეგად მოევლინნენ. თითოეულის წონა 1,3-დან 1,4 კილოგრამამდე მერყეობს, რაც, ექიმების შეფასებით, სრულფასოვანი და ჯანსაღი განვითარების ძალიან მაღალ შანსს იძლევა.
თავად 35 წლის ბედრია იხსენებს, რომ ექოსკოპიურ გამოკვლევებზე ექიმები მხოლოდ ოთხ ნაყოფს ხედავდნენ. შესაბამისად, მეხუთე ბავშვის დაბადება ოჯახისთვის მოულოდნელი, თუმცა უზომოდ სასიხარულო შოკი აღმოჩნდა. პატარებს ნაიფი, ამარი, მუნზირი, ნაზირა და ანსარი დაარქვეს.
