აშშ-ში მყოფი უცხო ქვეყნის მოქალაქეები „მწვანე ბარათის“ მისაღებად განაცხადის შეტანას სამშობლოში დაბრუნების შემდეგ შეძლებენ. ინფორმაციას Reuters-ი აშშ-ის მოქალაქეობისა და იმიგრაციის სამსახურზე (USCIS) დაყრდნობით ავრცელებს.
USCIS-ის მიერ მიღებული ახალი წესი „განსაკუთრებულ შემთხვევებში“ გამონაკლისებს ითვალისწინებს.
აშშ-ის მოქალაქეობისა და იმიგრაციის სამსახურის განცხადებით, აღნიშნული გადაწყვეტილება სააგენტოს რესურსებს გამოათავისუფლებს, რათა ვიზებთან დაკავშირებით სხვა საქმეები განიხილოს.
„როდესაც უცხოელები განაცხადს თავიანთი ქვეყნებიდან აკეთებენ, ეს იმ პირთა პოვნისა და გაძევების აუცილებლობას ამცირებს, რომლებიც ბინადრობის ნებართვაზე უარის შემდეგ მიმალვას ან აშშ-ში არალეგალურად დარჩენას ირჩევენ. დროებითი ვიზის მქონე პირები, როგორიცაა სტუდენტები, დროებითი მუშები ან ტურისტული ვიზის მქონე პირები, აშშ-ში მოკლე ვადით და კონკრეტული მიზნით ჩამოდიან. ჩვენი სისტემა შექმნილია იმისთვის, რომ მათ ქვეყანა ვიზიტის დასრულების შემდეგ დატოვონ. მათი ვიზიტი „მწვანე ბარათის“ მიღების პროცესში პირველი ნაბიჯის ფუნქციას არ უნდა ასრულებდეს“, – ნათქვამია უწყების განცხადებაში.
