“თქვენ რომ ბიჭი მოკალით, მე ის ბიჭი პეტრე-პავლეს სასაფლაოზე, მიწაში დავმარხე” – გიგა ავალიანის დედა

ეკა კუპატაძემ მოსამართლეს მადლობა გადაუხადა და აღნიშნა, რომ მან არა მარტო მისი შვილის ღირსება, არამედ მთელი საქართველო დაიცვა თავისი განაჩენით.

“ყველაფერს გავაკეთებ იმისთვის, რომ ყველა დამნაშავემ ასე მოისმინოს უმაღლესი სასჯელი. მივმართავ იმათ, ვინც გარეთ არის დარჩენილი, ბრალდებულებს. თქვენ რომ ბიჭი მოკალით, მე ის ბიჭი პეტრე-პავლეს სასაფლაოზე, მიწაში დავმარხე. თქვენ რა გგონიათ? მე, ჩემი, ზრუნვაში გაზრდილი შვილი ცივ მიწაში რომ ჩავფინე, სახლში თბილ ლოგინს მოვაშურე? არა, მე სახლში თქვენთვის დავბრუნდი მკვლელებო. ყველა მოისმენთ უმაღლეს სასჯელს, როგორც დღეს მოისმინა ორმა დამნაშავემ.

მოსამართლე დემეტრე ჯინჯოლიამ, დღეს ახსენა, რომ გიგა ავალიანი იყო სრულად უდანაშაულო. დემეტრე ჯინჯოლიამ, ახალგაზრდა მოსამართლემ, უშიშრად, სამართლიანი სიტყვით, ღირსეულად დაიცვა ღირსებული ახალგაზრდის – გიგა ავალიანის ღირსება. მე მას სხდომათა დარბაზში პირადად ვუთხარი მადლობა და კიდევ ერთხელ, დიდი მადლობა მას ჩემგან. მან არა მარტო ჩემი შვილის ღირსება დაიცვა, არამედ საქართველოს მომავალიც დაიხსნა გარკვეულწილად. მე საქმის მასალებით ვიცი, ვინ არიან ესენი. საქმე იმდენად მოცულობითია, ყველაფრის თქმა წარმოუდგენელია. მე ვიცი ვინ არიან ესენი. დიახ, დემეტრე ჯინჯოლიამ თქვენც დაგიცვათ დღევანდელი უშიშარი სიტყვით”, – აღნიშნა ეკა კუპატაძემ.

შეგახსენებთ, გიგა ავალიანის საქმეზე მკვლელობის მომზადებაში ბრალდებულ დემეტრე ჩიქოვანს 9 წლითა და 9 თვით პატიმრობა მიესაჯა. ხოლო დანაშაულის შეუტყობინებლობისთვის დაკავებულ ანა ნასყიდაშვილს 5 წლით და 3 თვით თავისუფლების აღკვეთა შეეფარდა. განაჩენი დღეს გამოცხადდა.

ამასთან, ავალიანის საქმეზე ალექსანდრე გაბაშვილს და გიორგი რიკაძეს 14-14 წლით თავისუფლების აღკვეთა აქვთ მისჯილი.