საჭირო ინგრედიენტები: 6 კვერცხი, 1 ჭიქა შაქარი, 1 ცალი ფორთოხლის ცედრა, ნახევარი ჭიქა ფორთოხლის წვენი, 270 გრამი ფქვილი, ცოტა სახამებელი, 1 სადილის კოვზი ცომის გამაფხვიერებელი.
კრემი: 500 მილილიტრი ფორთოხლის წვენი, 1 შეკვრა ტკბილი ვანილი, 1 ქილა შესქელებული რძე, 300 მილილიტრი ნაღები, 2 სადილის კოვზი შაქრის პუდრა, 1 სადილის კოვზი ფორთოხლის ცედრა, სახამებელი.
დასანამი: ნახევარი ჭიქა ფორთოხლის წვენი, 1 სადილი კოვზი ლიქიორი.
მომზადების წესი: კვერცხის ცილა და გული გააცალკევეთ ერთმანეთისგან. ცალკე კარგად ათქვიფეთ ცილა. შეურიეთ შაქარი და ძალიან კარგად ათქვიფეთ. ნელ-ნელა შეათქვიფეთ კვერცხის გულები.
გახეხეთ ერთი ფორთოხალი. ცალკე თასში ერთმანეთს შეურიეთ გაცრილი ფქვილი, ცომის გამაფხვიერებელი და ცოტა სახამებელი. ნელ-ნელა შეურიეთ ფორთოხლის ახლად გამოწურული წვენი, სასურველია, ცოტა მწარე იყოს. კარგად აურიეთ, დაუმატეთ კვერცხის მასა და ათქვიფეთ მიქსერით. ჩაასხით 26 სანტიმეტრი დიამეტრის ცხიმწასმულ ფორმაში. გამოაცხვეთ 180 გრადუსზე 35-40 წუთის განმავლობაში. ბისკვიტი გააცივეთ. გაყავით სიბრტყეზე სამ ნაწილად და დანამეთ. მოამზადეთ მოხარშული კრემი, იმ განსხვავებით რომ რძის მაგივრად გამოიყენეთ ფორთოხლის წვენი. შეათბეთ 500 მილილიტრი წვენი, შეურიეთ სახამებელი, ვანილი და მოადუღეთ. გააცივეთ. ათქვიფეთ მიქსერით ფორთოხლის ცედრასთან ერთად. დაამატეთ შესქელებული რძე და ათქვიფეთ. შეურიეთ ნაღები და ათქვიფეთ ძალიან კარგად. თუ ტკბილი გიყვართ, 2 სადილის კოვზი შაქრის პუდრაც შეურიეთ. წაუსვით ბისკვიტის ფენებს კრემი და ააწყვეთ ტორტი. ზედაპირიც დაფარეთ კრემით და მორთეთ ფორთოხლის ნაჭრებითა და ნუშის ფანტელით.
