„ვალენსიამ“ ლა-ლიგაში ზედიზედ მე-10 წაუგებელი მატჩი ჩაატარა და „ხეტაფე“ 3:0 დაამარცხა.
გიორგი მამარდაშვილმა სამჯერ იხსნა გუნდი და ძალიან კარგად ითამაშა.
ესპანურმა მედიამ მისი თამაში შესაბამისად, დადებითად შეაფასა:
AS: „ძალიან სერიოზული თამაში მეკარისგან, რომელმაც ყველაფერი გააკეთა იმისთვის, რომ „ხეტაფეს“ გოლი ვერ გაეტანა. მას ბევრი საქმე არ ჰქონია, მაგრამ 90 წუთის განმავლობაში კონცენტრირებული იყო“.
Eldesmarque: „დიდი ოსტატობის მატჩი. იშვიათად ერთვებოდა თამაშში, მაგრამ როდესაც ამის გაკეთება უწევდა, ლამაზი სეივებით ჩნდებოდა“.
მატჩის შემდეგ „ვალენსიას“ მთავარმა მწვრთნელმა კარლოს კორბერანმაც არ დაივიწყა თამაშის შეფასებისას მამარდაშვილის წვლილი ეხსენებინა.
„პირველ წუთებში ცოტა გაგვიჭირდა „ხეტაფეს“ ზეწოლის გამო. შემდეგ გუნდმა თამაშზე კონტროლი მოიპოვა, პრესინგი დაძლია და მეტოქის ნახევარზე გადავედით. მომენტები კარგად გამოვიყენეთ, გიორგისაც ორი კარგი სეივი ჰქონდა“, – განაცხადა კორბერანმა.
შეგახსენებთ, გიორგი მამარდაშვილს ლა-ლიგის მიმდინარე სეზონში ჩატარებულ 31 მატჩში 8-ჯერ კარი მშრალად აქვს შენახული. „ვალენსია“ 45 ქულით მეცხრე ადგილამდე აღზევდა, მომდევნო ტურში, 14 მაისს, სტუმრად „ალავესს“ შეხვდება.
