თეთრი სახლის ლიდერმა დონალდ ტრამპმა ჟურნალისტებთან საუბრისას თქვა, რომ როდესაც საქმე ეხება რუსეთსა და უკრაინას შორის სამშვიდობო მოლაპარაკებებს, არაფერი მოხდება იქამდე, სანამ ის და კრემლის ლიდერი ერთმანეთს არ შეხვდებიან.
„არაფერი მოხდება, სანამ პუტინი და მე ერთმანეთს არ შევხვდებით. ის {პუტინი} წასვლას აპირებდა, ეგონა, რომ მე ჩავიდოდი სტამბოლში. მე თუ არ წავიდოდი, ცხადია ის არ ჩავიდოდა. მოგწონთ ეს თუ არა, სანამ ჩვენ ერთმანეთს არ შევხვდებით, არაფერი მოხდება. ჩვენ ამ საკითხის {კონფლიქტი უკრაინაში} მოგვარება მოგვიწევს, რადგან იქ ძალიან ბევრი ადამიანი იღუპება“, – განუცხადა ტრამპმა ჟურნალისტებს.
ინფორმაციისთვის, 15 მაისს თურქეთის ქალაქ ანკარაში უკრაინის კონფლიქტთან დაკავშირებით რუსეთ-უკრაინის დელეგაციების შეხვედრაა დაგეგმილი.
რუსეთის პრეზიდენტის პრესმდივანმა დმიტრი პესკოვმა აღნიშნა, რომ ჯერჯერობით არ არსებობს კონკრეტული ინფორმაცია იმის შესახებ, თუ როდის შეიძლება დაიწყოს რუსეთ-უკრაინის მოლაპარაკებები სტამბოლში და ვინ დაესწრება მას კიევიდან.
უკრაინის დელეგაციის შემადგენლობაში შედიან ზელენსკის ოფისის უფროსი ანდრეი ერმაკი, უკრაინის თავდაცვის მინისტრი რუსტემ უმეროვი და საგარეო საქმეთა მინისტრი ანდრეი სიბიგა.
რაც შეეხება რუსეთის დელეგაციას, მას ვლადიმერ პუტინის თანაშემწე ვლადიმერ მედინსკი ხელმძღვანელობს.
