რუსი მეცნიერი ქსენია პეტროვა, რომელიც აშშ-ში კონტრაბანდული გზით ბაყაყების ემბრიონების შეტანას გეგმავდა, დააკავეს და ფედერალურ ციხეში მოათავსეს. ამის შესახებ „მედუზა“ იუწყება.
ბრალდების დასკვნაში წერია, რომ პეტროვა ბოსტონის აეროპორტში დააკავეს. მისი ბარგის შემოწმებისას ბიოლოგიური მასალები აღმოაჩინეს, რომელთა დეკლარაციაში შეტანა აშშ-ში შესვლისას სავალდებულოა.
პეტროვა თავდაპირველად უარყოფდა, რომ აშშ-ის ტერიტორიაზე ბიოლოგიური მასალების შეტანას გეგმავდა, მაგრამ შემდეგ აღიარა, რომ ბიომასალები გადაჰქონდა, მაგრამ არ იცოდა, რომ ამის შესახებ დეკლარაციაში უნდა ჩაეწერა.
კონტრაბანდაში ბრალდება, რომელიც პეტროვას წარუდგინეს, 20 წლამდე პატიმრობას და 250 000 აშშ დოლარის ჯარიმას ითვალისწინებს. არ არის გამორიცხული, რომ პეტროვამ სასჯელს თავი აარიდოს, მაგრამ აშშ-დან მისი დეპორტაცია მოხდება და ვიზა გაუუქმდება.
