ირანის სასამართლომ ცნობილ ირანელ მომღერალ ქალს, პარასტუ აჰმადისს, 74 როზგი დამატებითი სასჯელის სახით მიუსაჯა. ხელისუფლების განცხადებით, ხელოვანს ბრალად ედება „საზოგადოებრივი მორალის შეურაცხყოფა“, რაც საზოგადოებრივი თავშეყრის ადგილას ისლამური სამოსის (ჰიჯაბის) ტარების წესის დარღვევასა და თავსაბურავის გარეშე გამოჩენაში გამოიხატა.
როზგის გარდა, სასამართლომ მომღერალს სხვა შეზღუდვებიც დაუწესა. განაჩენის მიხედვით, მას ორი წლის განმავლობაში ეკრძალება ქვეყნიდან გასვლა და სოციალური ქსელებით სარგებლობა. ასევე, დაეკისრა იძულებითი მონაწილეობა ოფიციალურ რელიგიურ და საგანმანათლებლო კურსებში.
პარასტუ აჰმადისის წინააღმდეგ საქმე მას შემდეგ აღიძრა, რაც სოციალურ ქსელებში გავრცელდა მისი ფოტოები და ვიდეოები, სადაც ის ტრადიციული თავსაბურავის გარეშე მღერის. ირანის ისლამური რესპუბლიკის კანონმდებლობით, ქალებისთვის საზოგადოებრივ სივრცეში ჰიჯაბის გარეშე ყოფნა სისხლის სამართლის დანაშაულად ითვლება.
ბოლო პერიოდში ირანის ხელისუფლებამ საგრძნობლად გაამკაცრა კონტროლი კულტურის სფეროს წარმომადგენლებზე, რომლებიც მხარს უჭერენ მოძრაობას „ქალი, სიცოცხლე, თავისუფლება“. ეს საპროტესტო ტალღა ქვეყანაში 2022 წელს, მახსა ამინის ტრაგიკული დაღუპვის შემდეგ დაიწყო, რომელიც მორალის პოლიციამ სწორედ „ჰიჯაბის არასწორად ტარების“ გამო დააკავა.
საერთაშორისო უფლებადამცველი ორგანიზაციები მკაცრად გმობენ ირანის სასამართლოს გადაწყვეტილებას და მას ადამიანის უფლებების უხეშ დარღვევად და თავისუფალი გამოხატვის ჩახშობის მცდელობად აფასებენ. თავად მომღერლის მხარდამჭერები კი აცხადებენ, რომ მსგავსი სასტიკი სასჯელები ვერ შეაჩერებს ირანელი ქალების ბრძოლას საკუთარი უფლებებისთვის.
